Xestión y sofitu a la investigación
Los resultaos de los nuesos y nueses investigadores nes últimes décades asitiáronnos internacionalmente ente les 500 meyores universidaes del mundu.
La Universidá d’Uviéu tien grupos ya infraestructures bien competitives n’investigación. Pa siguir creciendo precisamos xenerar ciencia excelente en toles árees de conocimientu aprovechando les sinerxes derivaes de la tresversalidá, promocionando’l talentu ya impulsando el papel de les muyeres nel sistema de ciencia y teunoloxía. D’esta forma vamos llograr aumentar la tasa d’éxitu na consecución de proyeutos competitivos nes distintes convocatories. El nuesu compromisu ye siguir aumentando los recursos destinaos al Plan de Promoción d’investigación, financiáu con recursos propios de la Universidá, según el fomentu de la investigación multidisciplinar.
Hai qu’aumentar el protagonismu de la universidá nel Plan de Ciencia, Teunoloxía ya Innovación del Principáu d’Asturies (PCTI), al traviés de la Conseyería de Ciencia Innovación y Universidá, llogrando faer efeutiva l’alliniación colos proyeutos estratéxicos de Transición Xusta y de la Transición Ecolóxica. La nuesa participación nel Conseyu Asturianu de Ciencia, Teunoloxía ya Innovación, xunto colos axentes sociales y les organizaciones empresariales, va dar un protagonismu a la nuesa universidá ensin precedentes.
Desarrollaremos un programa d’atraición de talentu (proyeutu ERC, contratu Ramón y Cajal, contratu Juan de la Venada y Beatriz Galindo) y vamos dotar al PDI de nueva incorporación de derechos a la hora de disponer d’un espaciu dignu de trabayu.
Nos últimos años nel nuesu país apostóse pola acreitación y financiación direuta de centros onde se fai investigación d’excelencia (programes Severu Ochoa y María de Maeztu). La Universidá d’Uviéu nun tien que perder esta oportunidá y, como n’otros ámbitos, tien d’asitiar les sos unidaes d’investigación hacia centros y unidaes d’excelencia.
Revindicaremos una Llei de la Ciencia y un programa de recursos humanos pa la I+D+i de la nuesa comunidá autónoma, que nos dexe competir con mayor éxitu, non solo nos programes del Plan Nacional, sinón tamién nos programes europeos como Horizonte Europa (2021-2027). Nun vamos escaecer tampoco otros programes internacionales, sobremanera los proyeutos de cooperación científica con Llatinoamérica y los programes globales de desarrollu sostenible y Axenda 2030.
L’espíritu de collaboración del actual equipu rectoral foi determinante pa rematar procesos d’investigación collaborativa col CSIC y el Principáu d’Asturies, al traviés de los dos Centros Mistos, CINN y el IMIB, que s’atopa en fase de tresformación en Centru Mistu, ensin escaecer les numberoses collaboraciones qu’esisten col INCAR. Esti espíritu tamién foi importante pa la puesta en marcha de la Fundación pa la Investigación Sanitaria d’Asturies (FINBA) y del Institutu d’Investigación Sanitaria del Principáu d’Asturies (ISPA), asina como l’entamu de l’actividá investigadora nesti postreru, nel que la mayor parte de les fasteres d’investigación tán llideraes por investigadores de la Universidá d’Uviéu.
En toa esta estratexa xuega un papel fundamental la medría de recursos pa la xestión de la investigación. Tanto los recursos humanos del Serviciu d’Investigación y los clústeres del Campus d’Excelencia Internacional, como’l refuerzu del serviciu d’informática, incluyíu’l cálculu científicu, van ser pa nós una prioridá.
Siguiremos col procesu d’afitamientu de les nueves ferramientes que se van incorporando al Portal del Investigador hasta llograr una xestión dafechu electrónica de la I+D+i. Procesos como la tramitación electrónica de les comisiones de serviciu y la xestión de los contratos de la Fundación Universidá d’Uviéu, tienen de completase con otros como la tramitación electrónica de factures y la compra centralizada al traviés d’una Central de Compres como les que yá operen na Fundación Universidá d’Uviéu.
Plan de Promoción de la Investigación
La recuperación d’un Plan de Promoción de la Investigación y el so afitamientu foi ún de los retos algamaos nesti periodu de xestión. Por aciu d’esti programa afitamos la financiación a los grupos d’investigación y llevóse alantre un programa de beques predoctorales ente otres aiciones relevantes. Nesta nueva etapa, partiendo d’unos niveles presupuestarios algamaos que superen llargamente’l millón d’euros, vamos aumentar la cuantía hasta los dos millones. Consolidaremos el plan pa caltener a los grupos esistentes y potenciar el despegue de los emerxentes, anque les condiciones económiques xenerales seyan adverses. A curtiu plazu, el nuesu oxetivu ye quintuplicar el númberu de contratos predoctorales, con especial incidencia nes árees onde nun hai estudiantes de doctoráu.
Estructures de sofitu a la investigación
La nuesa filosofía de xeneralizar l’actividá investigadora a tol PDI de la Universidá d’Uviéu, particularmente n’fasteres que tradicionalmente recibieren menor atención, llevónos a crear un Clúster pal sofitu de la investigación en Ciencies Sociales y Xurídiques y Humanidaes. Esta iniciativa tornóse nun aumentu claru de l’actividá investigadora nesti ámbitu. Durante los sos dos años de funcionamientu asistió a 77 grupos d’investigación y tramitó 63 propuestes de les que llogró financiación en 14. La incorporación de grupos d’investigación de les árees d’Humanidaes y Ciencies Sociales a esta convocatoria redunda nun importante aumentu de l’actividá y la producción científica nestes árees.
Nesti nuevu periodu rectoral apostaremos por reforzar los recursos humanos del Serviciu d’Investigación, y vamos impulsar la creación d’una unidá especializada n’auditoríes que facilite la superación de los procesos a los que tán sometíos munchos proyeutos d’investigación. Adicionalmente, vamos contratar como unidá de sofitu a una o delles consultores especializaes que collaboren na preparación y el siguimientu de los proyeutos d’investigación nacionales, europeos ya internacionales.
No que se refier a la infraestructura informática, rematemos la puesta en marcha del sistema de xestión entamada pol equipu rectoral anterior cola integración de la FUO nel mesmu. La implantación d’esta complexa ferramienta supunxo un retu ensin precedentes. Nel próximu mandatu vamos siguir incorporando nuevos módulos a la ferramienta col oxetivu d’amenorgar la duración de los trámites alministrativos en xestión de proyeutos y contratación de personal investigador.
Servicios Científico-Téunicos (SCTs)
Los Servicios Científico Téunicos son un componente esencial na actividá investigadora de la nuesa universidá. Dan-y a los grupos d’investigación l’accesu a téuniques, equipamientu y servicios. Esti sofitu ha estendese a cualquier empresa o organismu públicu o priváu que lo solicite, racionalizando y optimizando los recursos disponibles na Universidá d’Uviéu.
Nestos postreros cuatro años, aumentamos la plantiya de personal evitando que nengún serviciu tea paráu por falta de personal cualificáu. Tamién, modificamos el Reglamentu de los SCT dexando que’l personal téunicu pueda participar en proyeutos d’investigación, lo que-yos dexó asistir a congresos, seminarios y xuntes rellacionaes cola so especialidá. Potenciamos l’espardimientu a les empreses, creando un apartáu específicu na páxina web y un trípticu cola ufierta de servicios axuntaos por sectores empresariales, lo que repercutió nuna medría na actividá de collaboración col sector productivu. Aumentamos el presupuestu añal p’arreglos y caltenimientu, meyorando’l contratu de caltenimientu d’equipos científicos y faciendo nuevos contratos pa equipos y servicios esenciales. Meyoramos el sistema de xestión con nueves funcionalidaes y una mayor automatización de los procesos, lo que facilitó l’adaptación de les xeres alministratives a la nueva normativa sobro contratos menores y meyoróse’l control sobro l’actividá y los recursos.
Pal próximu mandatu plantegamos una serie d’aiciones de fondu caláu. Vamos buscar una fórmula pa la problemática llegal pa contratar personal téunico. Entamaremos un plan de formación específica pa personal téunico, fomentando les rellaciones y l’intercambéu con servicios similares d’otres universidaes, asina como la realización d’estancies curties en centros de referencia que-yos dexen conocer les últimes novedaes nel so campu de trabayu.
Vamos solicitar al Gobiernu del Principáu d’Asturies que cree una convocatoria específica pa la renovación y actualización d’equipamientu científico-téunicu xunto con una mayor aportación de fondos FEDER a la convocatoria d’ayudes pa l’alquisición d’infraestructures del Plan Estatal d’Investigación Científica y Téunica y d’Innovación.
Aumentaremos el presupuestu añal p’arreglos de grandes equipos xunto col caltenimientu y renovación d’equipos auxiliares (Sistema d’Alimentación Ininterrumpío (SAI), equipos de refrigeración (Chillers), etc.).
Vamos certificar los Servicios Científicu-Téunicos según la norma de Xestión de calidá ISO 9001-2015 pa darréu acreitar aquellos ensayos que puedan tener una mayor demanda per parte de la industria.
Accesu a la información y divulgación científca
La irrupción imparable de la Ciencia Abierta, el Open Science, supón un nuevu plantegamientu de la política de financiación de la publicación científica, de la nuesa política d’accesu a la información y de la evolución de la nuesa inversión n’accesu a bases de datos y publicaciones. Vamos poner en marcha programes pa la financiación de la publicación d’artículos científicos n’abierto pa consiguir el máximu espardimientu de los nuesos trabayos. Ello ye que vamos financiar la publicación n’abierto en revistes del primera cuartil o equivalente en Ciencies Sociales y Humanidaes.
P’aumentar la visibilidá de les nueses publicaciones, vamos potenciar los sistemes de tresferencia automática de los datos sobro los grupos d’investigación y la so producción científica hacia organizaciones internacionales de xestión bibliométrica.
La Unidá de Cultura Científica y de la Innovación de la Universidá d’Uviéu aumentó nestos años la so actividá tanto en númberu d’eventos como númberu de persones implicaes. Amás aumentóse la financiación recibida per parte de FECYT y l’UE. La nuesa UCC+i llogra regularmente fondos de les convocatories de FECYT con excelente valoración. Los planes de futuru pasen por diversificar les actividaes p’algamar un mayor impautu social, intensificar la collaboración colos conceyos, llevar la divulgación científica a tol territoriu del Principáu d’Asturies y algamar al públicu de toles edaes.
Vamos fomentar la collaboración en proyeutos con financiación europea, lliderando iniciatives dientro de G-9 y CRUE, aumentando la producción de conteníos propios espublizaos al traviés de redes sociales como Twitter, Instagram o Facebook, y otres plataformes similares que yá utilizamos regularmente o la promoción de la Canal YouTube de la Universidá d’Uviéu o tamién implicándonos n’iniciatives editoriales de divulgación científica, incentivando la medría de la nuesa participación ya impautu na plataforma The Conversation España de la que la Universidá d’Uviéu ye sociu fundador.
Serviciu de publicaciones
El Serviciu de Publicaciones promueve les ediciones de llibros y revistes como espardimientu de la investigación y sofitu a la docencia y constitúi’l sellu editorial d’esta universidá. Ta dixebráu en trés grandes fasteres, imprenta, llibrería y editorial.
Nestos cuatro años trabayamos intensamente na implantación d’una xestión por procesos, rematada col llogru primero d’un sellu EFQM y darréu cola ISO 9001. Reestructuramos les colecciones, cola creación de conseyos científicos propios y especializaos y l’apueste pola edición dixital y l’accesu abiertu.
Nel próximu mandatu vamos potenciar les colecciones de referencia, afayándoles a los requisitos del sellu CEA-APQ, la edición dixital y axustar les tiraes en papel, aprovechando les posibilidaes de la edición so demanda y les coediciones, tanto en colecciones como en monografíes individuales. Vamos impulsar la coedición con editoriales universitaries llatinoamericanes. Promoveremos la implantación de modelos de xestión editorial integral como asocede coles revistes, tanto p’actes de congresos como pa monografíes, y vamos reforzar venceyos con otres editoriales universitaries, especialmente nel marcu de UNE y del G-9. Vamos consolidar la comercialización del fondu editorial al traviés de distintes plataformes de vienta y agregadores de llibru electrónicu. Priorizaremos la edición n’abierto y reforzaremos la collaboración cola biblioteca universitaria aprovechando sinerxes. Amás, vamos crear un plan d’actualización teunolóxica pal nuesu personal, lo que-yos va dexar afayase a un contestu de constantes meyores teunolóxiques.
Tresferencia y collaboración cola empresa
La tresferencia constitúi, xunto cola formación y la investigación, el tercer pegollu básicu de cualquier universidá moderna. Nesti mandatu dímos-y un impulsu importante a la collaboración y xeneración d’enfotu col texíu empresarial. Ello refléxase nel bultable aumentu de los ingresos llograos al traviés de contratos de los regulaos pol artículu 83 de la LOU (más de 400 contratos añales xestionaos pola Fundación Universidá d’Uviéu), asina como na medría de cátedres institucionales y d’empresa, más de 30 creaes nesta etapa. Esta estructura de cátedres vieno a amosar la so eficacia na collaboración coles instituciones y el texíu empresarial. Pa potenciar la so visibilidá entamó a celebrase la Xornada de Cátedres Institucionales y d’Empresa de la Universidá d’Uviéu, un alcuentru que, pola so aceptación y proyección, ta llamáu a perdurar.
Estes 30 cátedres traxeron importantes beneficios tanto pal estudiantáu, que puede tener un contautu direutu coles instituciones y empreses collaboradores y alquirir esperiencia llaboral, como pa grupos d’investigación, y suponen unos ingresos añales d’al rodiu de 600.000 euros. Ye la nuesa vocación pal siguiente mandatu disponer d’una regulación específica pa cátedres y consolidar toles esistentes. Amás, vamos siguir creciendo tanto en númberu como n’ingresos, coles mires de superar el mediu centenar y unos ingresos estabilizaos añales d’un millón d’euros.
En materia de xeneración empresarial —spin-off y spin-out—, resulta necesario fortalecer el desarrollu normativu esistente, fomentando y sofitando la cultura entamadora. Vamos facilitar los medios (formación, sofitos téunicos, financiación) que favorezan que la iniciativa empresarial se desarrolle venceyada a la esistencia de les mires de negociu surdíes de l’actividá investigadora y que, adicionalmente, xustifiquen el llogru d’ayudes de calter públicu pa proyeutos collaborativos. Va emprestase especial atención na xeneración empresarial a partir del conocimientu xeneráu dende les fasteres de conocimientu d’Artes y Humanidaes y de Ciencies Sociales y Xurídiques.
La Fundación Universidá d’Uviéu dende la so creación en 1997 foi una pieza clave na xestión de los contratos del artículu 83 de la LOU, pola so axilidá y versatilidá, según la so capacidá d’adaptación a les diverses situaciones que reclamen los nuesos socios industriales ya institucionales. La so actividá intensificóse nesta etapa, non solo nel área d’Investigación sinón tamién nes fasteres d’Empleabilidá y de Divulgación del Conocimientu de la Ciencia, aumentando’l so volume de xestión dende los más de cinco millones en 2016 hasta cuasi siete millones en 2019. La xestión de les cátedres d’empresa ya institucionales, el Foru d’Empléu o’l Programa Suma Talentu son actividaes esenciales que llevamos alantre al traviés de la so encomienda de xestión.
Dempués d’una etapa de desconexón por cuenta de los cambeos na aplicación de xestión de la investigación, la xestión de la fundación atópase dafechu integrada nel nuevu portal del investigador. No que se refier a los espacios físicos, a la sede d’Uviéu añediéronse dos sedes nos Campus de Xixón y Mieres, lo que va averar una mayor proximidá a la xestión.
Recursos humanos pa la investigación
Nel Principáu d’Asturies ye preciso desarrollar un modelu de captación de talentu investigador y xestión de recursos con niveles d’autonomía y responsabilidá similares a los que disponen les meyores universidaes europees y aprovechar les capacidaes de los centros de nuevu cuñu, apocayá creaos, p’asina poder competir, n’igualdá de condiciones y llevar alantre la investigación d’excelencia.
La nuesa Escuela de Doctoráu y los nuesos programes de doctoráu, según los programes de contratos predoctorales, tienen d’actuar como elementos de captación de personal investigador en formación que va formar parte y va favorecer el relevu xeneracional de les nueses plantiyes y les de los departamentos d’I+D+i de les empreses y centros teunolóxicos d’Asturies.
Promoveremos el desarrollu d’un tenure-track de calidá pal PDI de les universidaes públiques, que puede desenvolvese tanto a nivel nacional como a nivel autonómicu. D’esta forma rebaxaríase’l problema del recambiu xeneracional na Universidá d’Uviéu, que nesti momentu ta fuertemente comprometíu. La captación y retención de talentu cunta con bien pocos mecanismos, quitando’l programa Ramón y Cajal, l’apocayá creáu Beatriz Galindo y los programes de la Institución Catalana d’Investigación y Estudios Avanzaos (ICREA) y la Fundación Vasca pa la Ciencia (IKERBasque), en Cataluña y el País Vascu. Estos modelos seríen fácilmente llogrables y afayaríense a la situación del Principáu d’Asturies.
Como oxetivu tresversal, siguiendo los encamientos que fai la European Platform of Women Scientists Position (EPWS.org), vamos desaniciar pasu ente pasu la fienda de xéneru na actividá investigadora, como yá ye habitual pa los programes europeos. Pondremos en marcha les midíes necesaries pa faer efeutiva la igualdá d’oportunidaes na carrera científica de muyeres y homes.
Les resultaos de los nuesos y nueses investigadores nes últimes décades asitiáronnos internacionalmente ente les 500 meyores universidaes del mundu.
Dímos-y un impulsu importante a la collaboración y xeneración d’enfotu col texíu empresarial. Ello refléxase nel bultable aumentu de los ingresos llograos al traviés de contratos de los regulaos pol artículu 83 de la LOU (más de 400 contratos añales xestionaos pola Fundación Universidá d’Uviéu)