“Si tuviere qu’escoyer ente un maestru o profesor increyible y una teunoloxía increyible pa los mios fíos o la de cualesquier otra persona, escoyería siempres al maestru o profesor increyible”
Salman Khan
“Imagination is the source of every
form of human achievement”
Ken Robinson
Nos sos 412 años d’hestoria, dende la so fundación por D. Fernando de Valdés, la Universidá d’Uviéu transitó cola vocación de ser un referente académico y cultural nel ámbitu llocal, nacional ya internacional. El nuesu rectoráu fai’l númberu 191 de la serie de rectores, darréu que esta universidá, anque tien un conseyu rectoral paritariu, inda nun tuvo una rectora al frente. Esti fechu tendría d’afalanos a siguir trabayando hacia la eliminación de la fienda de xéneru. Esta llarga hestoria tuvo enllena d’eventos de gran relevancia, como la creación de la Estensión Universitaria, de la nuesa Biblioteca Universitaria o la primer publicación de los Añales de la Universidá d’Uviéu. Sicasí, dende va unos meses vivimos una etapa singular. Un tiempu de pandemia que nos pon a prueba, que camudó de sópitu’l nuesu comportamientu, la nuesa forma de rellacionanos y qu’incidió fondamente nel sistema universitariu global y en particular na nuesa universidá. A esti retu la Universidá d’Uviéu respondió de mou exemplar, calteniendo a plenu funcionamientu un serviciu públicu fundamental ya indispensable. Esti llabor fexóse priorizando la seguridá sanitaria de tolos miembros de la comunidá universitaria y nella foi clave la dedicación del profesoráu y del personal d’alministración y servicios, asina como l’esfuerzu del estudiantáu y de les families p’afaese a esta situación. Los campus, les facultaes y escueles, los departamentos, dientro de la so autonomía, fueron capaces d’afaese a una nueva realidá, difícil de xestionar. Quede equí la nuesa máxima felicitación y reconocimientu.
El 16 de mayu de 2016 tomamos el testigu que nos dio la comunidá universitaria, cola mesma ilusión cola qu’escribimos esti programa electoral. Dende entós nun dexamos de trabayar, a comuña con tola comunidá universitaria, pa llograr cola nuesa actividá diaria que la universidá asturiana algame más y meyores oxetivos. Fuimos fieles al nuesu programa y al nuesu proyeutu. Nun desdexamos l’enfotu d’asitiar a la nuesa institución nos niveles más altos dientro del sistema universitariu del nuesu país, nel espaciu européu d’educación superior ya investigación y nel ámbitu internacional.
El resultáu ye qu’en 2020 tenemos una universidá oxetivamente meyor asitiada nel contestu nacional ya internacional, consolidada ente les 500 meyores del mundu, meyorando tamién la nuesa posición relativa ente les españoles. Al empar desarrollamos un altu nivel de tresparencia partiendo d’una situación calificada nos rankings como opaca. Pa ello aprobamos nuevos reglamentos, creando comités tan importantes como’l de calidá y el d’ética y regulando cuestiones como’l paru académico. Meyoramos les nueses infraestructures teunolóxiques y tamién se meyoraron unos edificios nos que se nota’l pasu del tiempu. Impulsamos de mou bien relevante la collaboración cola empresa, la tresferencia y el emprendimientu.
Pa la consecución d’estos llogros, aplicamos una filosofía de corresponsabilidá, dando mayor capacidá económica a centros y departamentos, y dexando a la comunidá universitaria definir les sos prioridaes por aciu de la implantación de los presupuestos participativos.
Amás, preocupámosnos del planeta buscando la sostenibilidá ambiental de toles nueses actuaciones.
La nuesa satisfaición colos resultaos llograos ye alta. Sicasí, danse múltiples retos nuna institución y nuna sociedá en cambéu y evolución constante. Ente ellos tán la meyora y simplificación de los procedimientos alministrativos, cola plena implantación de l’alministración electrónica, o la necesaria evolución de les metodoloxíes docentes, la transición hacia nueves titulaciones semipresenciales o online, pa lo que tenemos d’entender l’actual coxuntura creada pola pandemia como una oportunidá que nos debe impulsar a acelerar la meyora d’esa necesaria tresformación. Esti saltu teunolóxicu, xuntu coles nueses meyores en docencia billingüe, va dotanos de ferramientes pa meyorar la captación d’estudiantáu estranxeru y, a lo cabero, va facenos ser más competitivos fuera y dientro del territoriu del Principáu d’Asturies.
Queremos que la Universidá d’Uviéu siga avanzando, creciendo, modernizándose, reivindicándose, formando cada vegada meyor al nuesu estudiantáu, potenciando los nuesos programes pa mayores, fomentando vocaciones en neños y neñes, espardiendo la cultura científica na sociedá, teniendo la investigación más avanzada en toles fasteres del conocimientu, y una influyencia cada vegada mayor y más integrada na sociedá asturiana. Too ello ensin arrenunciar a la nuesa aspiración de siguir siendo’l motor del desendolque económicu y l’ascensor social del Principáu.
Ye por eso que solicito’l to sofitu pa que los próximos cuatro años llogremos xuntos, toos y toes, una universidá dafechu integrada nel espaciu européu d’educación ya investigación superior y con reconocimientu internacional. Vamos caltener el clima de calma y estabilidá, y vamos favorecer les meyores condiciones pa llevar alantre’l nuesu trabayu, docente, discente, de xestión y téunicu. Vamos siguir siendo un motor del progresu cultural, social y económicu d’Asturies, cola nuesa investigación y tresferencia. Vamos construyir, al traviés de les persones, una sociedá más xusta y caltenible, entamadora, qu’atraiga talentu y xenere actividá económica, estabilidá y un futuru de desarrollu sostenible, qu’ilusione a les nueves xeneraciones d’asturianes y asturianos.
Nun dexamos de trabayar, en xuntura con tola comunidá universitaria,
pa llograr cola nuesa actividá diaria que la universidá asturiana algame más y meyores oxetivos