Esperiencia

ESPECIALIZACIÓN ACADÉMICA

Catedráticu de Química Física na Universidá d’Uviéu. Llicenciáu en 1980 y Doctoráu en 1984, en Química, completó la so formación académica como becariu postdoctoral na Universidá de Nijmegen (Holanda), ente 1985 y 1987, col Profesor Paul T. Beurskens. Especialista en determinación estructural, cristalografía, difracción y cálculos moleculares. ExPresidente de la European Crystallographic Association (ECA) onde sirvió dende agostu de 2006, apocayá foi escoyíu Ordinary Member del Executive Committee de la International Union of Crystallography.

ACTIVIDÁ DOCENTE Y RESULTANCIES D’INVESTIGACIÓN

La so actividá docente foi intensa tantu en Llicenciatura y Grau en Química, como n’estudios de Doctoráu. Tamién imparte docencia billingue, español ya inglés, en programes Máster de la Universidá d’Uviéu y de la Universidá Internacional Menendez Pelayo.

Autor de más de 500 artículos científicos y de divulgación científica, dellos capítulos de llibros y numberoses comunicaciones y ponencies presentaes en congresos, sobre estudios químico-físicos de nuevos materiales, estructura molecular, cristalografía, difracción y métodos de cálculu, tien un Índiz H de 44. Ye coautor del programa de cristalografía DirDif citáu más de 3000 vegaes y lideró más de 30 proyectos d’investigación, nacionales y europeos, contratos con empreses y proyectos de divulgación científica. Lidera’l Grupu d’Investigación SYSTAM, del Departamentu de Química Física y Analítica, declaráu Grupu d’Excelencia del Principáu d’Asturies nel añu 2001. Ye responsable de la instalación d’infraestructura na Llínea Española del Sincrotrón del ESRF. Dirixó 18 tesis doctorales. La so actividá investigadora foi evaluada positivamente en 5 sexenios y fuéron-y reconocíos satisfactoriamente 7 quinquenios d’actividá docente.

RESPONSABILIDAES DE XESTIÓN

Dende mayu de 2008 hasta abril de de 2012 foi Vicerrector d’Investigación de la Universidá d’Uviéu, y Secretariu Executivu de la Sectorial d’I+D de la CRUE. Mientres mas de 35 años de serviciu na Universidá d’Uviéu, ocupó diversos cargos académicos y responsabilidaes como Secretariu del Departamentu de Química Física y Analítica de 1990 a 1994; Vicedecanu de la Facultá de Química de 1998 a 2008; Coordinador del Comité d’Evaluación de la Llicenciatura en Química; Presidente de la Comisión de siguimientu del Plan de Meyores de la Titulación de Química y Miembru de la Comisión de la ellaboración del Grau en Química en 2008; Ceador del del Serviciu Científicu Técnicu de Determinación d’Estructures Cristalines por Difracción de Rayos X y Director del mesmu mientres más de 20 años, y Coordinador de la Rede d’Ordenadores y de la Xestión de la rede de comunicaciones del Centru de Cálculu Científicu de la Facultá de Química. Diverses actividaes de Xestión de la Evaluación de programes del MINECO (Programa Esquiza) y de la ACSUG, ente otres. Editor, asesor y evaluador de publicaciones científiques Internacionales. Miembru de la Real Sociedá Española de Química, Grupu Especializáu de Cristalografía y Crecimientu Cristalinu (Presidente Saliente) y de la British Crystallographic Association.