Estensión Universitaria

Nesti periodu aumentamos de mou bultable les actividaes d’Estensión Universitaria: conferencies, esposiciones y aules. Punximos en marcha la Orquesta Universitaria, que yá percuerre tol territoriu asturianu faciendo prestosos conciertos. Potenciamos les Aules d’Estensión Universitaria (que regulamos y normalizamos nesti mandatu) por aciu’l patrociniu/collaboración con otres entidaes públiques y privaes.

Pal nuevu mandatu, vamos buscar la implantación y reconocimientu d’un currículum complementariu que, reflexando toles actividaes estracurriculares desendolcaes pol estudiantáu, acompañe al académicu. En rellación con esti currículum complementariu, vamos facer el pasaporte cultural, que va reconocer l’asistencia del estudiantáu a actividaes culturales, deportives y de cooperación puestes en práutica por entidaes con conveniu cola Universidá d’Uviéu. Vamos siguir la collaboración colos conceyos p’ampliar na ufierta de Cursos d’Estensión “a demanda” que dexen anovar ya impulsar los cursos nes convocatories ordinaries, especialmente la de branu. Esta collaboración pue ampliase a asociaciones que pueden demandar formación a la Universidá d’Uviéu con esta fórmula.

PUMUO

Dende 2016, el Programa pa Mayores de la Universidá d’Uviéu (PUMUO) esperimentó un espardimientu territorial y un crecimientu constante, impulsando de mou bien importante la formación universitaria ente los mayores de 50 años. Aumentamos de mou esponencial l’estudiantáu y punximos en marcha una nueva sede en Mieres y otra en L.luarca. El retu pa estos cuatro años ye aumentar el númberu de sedes, espardiendo’l programa  de mou qu’algamemos a la población nesta franxa d’edá distribuyida per tol territoriu asturianu. Poro, va ser prioritario allargar la ufierta de PUMUO al oriente d’Asturies, asitiándolu nuna nueva sede cola collaboración de los conceyos d’esta zona. Vamos facer por algamar en 2024 la cota de los 1200 estudiantes, llueu de llograr doblar el númberu d’estudiantes nel añu 2019 sobro los del 2016.

Programes pa la infancia y la mocedá

Dímos-yos puxu a los programes pa la mocedá dende la Unidá de Cultura Científica algamando non solo a los que tán n’etapes preuniversitarias, sinón tamién a los más pequeños de la casa. Aiciones como La Nueche de les y los Investigadores, onde la Universidá d’Uviéu llidera un proyeutu de les universidaes del Grupu 9, o la Selmana de la Ciencia afitáronse como referencies na vida cultural asturiana. Estes aiciones complementáronse col programa Universidá pa Neñes y Neños que llevó los talleres científicos a más de 6.000 rapacinos y rapacines de toa Asturies. Nel programa púnxose especial procuru a l’atención de les zones rurales onde la universidá tien una escasa presencia. El so oxetivu foi la creación de vocaciones científiques, pero, amás, estableció la primer rellación coles y los potenciales estudiantes del próximu deceniu. Nesta nueva etapa vamos ampliar la cobertoria de les nueses aiciones tanto de la Universidá pa Neñes y Neños como La Nueche de les y los Investigadores y la Selmana de la Ciencia, aumentando tanto’l númberu de xeres como les llocalidaes nes que se facen, asina como la collaboración colos centros d’enseñanza preuniversitaria. L’oxetivu va ser claru: xenerar cantera pa la universidá de los próximos venti años.

Aliances internacionales

Nestos postreros cuatro años, féxose un fondu llabor d’internacionalización. Les dobles titulaciones, los intercambeos y les collaboraciones n’investigación nacen ente instituciones que se conocen y tienen rellaciones ente elles. Una de les aiciones principales foi la busca d’aliances internacionales. De toes elles, ye necesario destacar l’Alianza d’Universidaes Ruses y Españoles (AURE) qu’empobina a la potenciación de les actividaes d’intercambeu d’estudiantáu y profesoráu, el desarrollu de proyeutos d’investigación conxuntos y la concurrencia a convocatories de la UE y de la Federación Rusa.

Amás, ordenamos los convenios billaterales con universidaes fuera del ámbitu de la UE, asegurando l’actividá en toos y caún d’ellos, mientres que, al empar, buscamos nueves aliances en zones xeográfiques onde la Universidá d’Uviéu entá nun tien muncha presencia (especialmente, África y Oceanía).

Nesti periodu tamién participamos na creación del Consorciu Iberoamericanu d’Universidaes pa la meyora de los procesos d’internacionalización, la cooperación internacional, la integración birrexonal y l’emprendimientu d’aiciones concretes conxuntes pa faer un frente común a los desafíos rexonales (esti consorciu emprimó con una Declaración d’Intenciones alcordada poles universidaes participantes nel Foru Internacional d’Universidaes Públiques d’Iberoamérica qu’entamamos n’ochobre 2019).

La implementación del Programa Campus América (col posible sofitu del Principáu d’Asturies o entidaes privaes) inclúi beques pa que los estudiantes de grau y de máster de la Universidá d’Uviéu faigan estancies educatives nes meyores instituciones d’Iberoamérica coles que yá tenemos conveniu y ayudes pa la circulación en dambos sentíos de profesoráu pa estancies d’investigación, docencia, y organización o xestión de titulaciones conxuntes nel estranxeru (yá entamáu en Chile).

Los nuesos programes con universidaes chines intensificáronse, de mou qu’ampliamos el númberu de convenios de collaboración con universidaes chines, non solo Shandong, el nuesu tradicional sociu, sinón universidaes en Peking y Xi’an. La nuesa collaboración cola Universidá de Lleón dexónos poner en marcha, na nuesa Casa de les Llingües, un Aula Confucio dependiente del Centru Confucio de Lleón.

Nos vinientes cuatro años, vamos dotar de conteníu a les aliances yá establecíes buscando’l so máximu aprovechamientu en toles sos dimensiones (docente, investigadora, cultural, etc.), faciéndoles más efeutives. Amás, vamos siguir la llinia yá definida de proyeutanos internacionalmente al traviés de socios estables colos que trabayar nel mediu y llargu plazu.

Cooperación al desarrollu

Les aiciones desarrollaes en rellación cola cooperación al desarrollu fueron estremaes. Punximos en marcha la I Selmana Solidaria. La Universidá d’Uviéu llogró’l sellu d’Universidá pol Comerciu Xustu, sofitáu pola UE. Punximos en marcha la Cátedra d’Estudios de Gobernanza Global Alimentaria (con un programa de beques pa trabayos d’estudiantes nesti ámbitu). Impulsamos, al llau de otres dos universidaes, l’Observatoriu del Derechu a l’Alimentación d’España y algamamos alcuerdos con universidaes cubanes de la mano de l’Asociación Española de Compañíes d’Investigación Clínica (AECIC). Creóse un Campus Internacional en Llatinoamérica y el Consorciu Iberoamericanu d’Universidaes. Amás, dende la nuesa universidá impulsóse de mou bien importante l’alianza Ciudaes pol Comerciu Xustu en collaboración colos distintos conceyos.

Pal nuevu mandatu, vamos siguir calteniendo’l nivel de llideralgu na cooperación del desarrollu consiguíu por aciu de nueves iniciatives añedíes pa dar oportunidaes a los que nun les tienen. Vamos iguar propuestes pa les distintes convocatories internacionales como, por exemplu, les europees de Ciudá pol Comerciu Xustu.

Deporte universitario

Durante los postreros cuatro años impulsamos el Deporte Universitario al traviés de distintes aiciones ya iniciatives. Acordies coles nueses promeses electorales, aumentóse la cuantía de les beques pal estudiantáu universitariu que formen parte de les nueses secciones deportives y robláronse convenios con distintos clubes y asociaciones deportives pa venceyalos como deportistes a la universidá. Amás, anovamos y enanchamos les nueses instalaciones, destacando ente toes elles la creación del ximnasiu del Campus de Xixón/Xixón, una demanda con más de 15 años, asina como la puesta en marcha d’un circuitu de carrera nun rodiu natural de gran guapura nel mesmu campus. Universalizóse y féxose gratuita la tarxeta deportiva universitaria, que ta incluyida na tarxeta universitaria única y que s’estiende al personal xubiláu y egresáu de la Universidá d’Uviéu.

Pa esti nuevu mandatu, plantegamos desarrollar el nuesu proyeutu de “Alianza pol deporte”. Dientro d’esti proyeutu un oxetivu prioritariu va ser la creación de nuevos espacios deportivos y el cambéu de los yá esistentes potenciando l’actividá física nel campu, por exemplu, por aciu la cobertoria de pistes esteriores y la creación de zones dotaes d’aparatos pa facer exercicios de calistenia. Esto combinaráse cola robla de nuevos alcuerdos con clubes a lo llargo y ancho de la xeografía asturiana que dexe avanzar nel fomentu de l’actividá deportiva universitaria de forma xeneralizada, ampliando l’abanicu de disciplines deportives.

La participación de los nuesos deportistes nos Campeonatos d’España Universitarios va ser, ensin llugar a dulda, otru de los oxetivos relevantes del próximu mandatu. El nuesu retu tien de ser aumentar el númberu d’estudiantes nes competiciones y ampliar les disciplines deportives añu tres añu.

Per otru llau, la práutica deportiva arreyada a la vida saludable nun debe de ser solo daqué enfocao al deportista d’élite, sinón que tenemos de tratar de concienciar al cien por cien de la comunidá universitaria nos beneficios que supon pa la salú. Pa ello vamos promover nueves actividaes deportives. El nuesu oxetivu de deporte y salú ye’l d’una comunidá universitaria comprometida cola salú y el medioambiente nuna redolada de campus saludable.

Llingua y Cultura asturianes

La Universidá d’Uviéu ye la única institución d’educación superior d’Asturies. Darréu d’ello tien la obligación hestórica de ser el referente en too aquello rellacionao cola cultura de la nuesa Comunidá Autónoma. Y a lo llargo tol mandatu cumplióse con toos y caún de los compromisos electorales alquiríos en 2016 nesti terrén.

La universidá incluyó la llingua asturiana xunto al inglés na so imaxe corporativa como símbolu de la normalización plantegada nel usu de la llingua autóctona en cartelería o señalética. Y, cumpliendo cola Llei d’Usu, afalóse tamién a que solicitúes y formularios pudieren facese n’asturianu al empar qu’en castellanu.

Féxose’l Comité Asesor de Normalización Llingüística y promoviéronse servicios de traducción pa que la información universitaria aportare a la comunidá na nuesa llingua tradicional. Y, lo más importante, cumplióse cola vieya reivindicación de garantizar la defensa tanto de Tesis Doctorales, como de TFGs y TFMs en llingua asturiana, resolviendo cuantes dificultaes se daben pa ello.

Too ello, ensin escaecer el diseñu de planes específicos pa promover y facilitar la investigación en llingua asturiana y la edición d’importantes obres científiques del área de conocimientu de Filoloxía Asturiana.

Nesti sen, vamos siguir dando preferencia a cualquier actividá rellacionada cola hestoria, la etnografía o la llingua asturiana, impulsando charres, conferencies, cursos y demás aiciones que caltengan y potencien la nuesa identidá cultural. Y vamos afondar en toles posibilidaes d’entamar los estudios de Filoloxía Asturiana y les posibilidaes d’ufiertar los servicios de normalización llingüística a tola comunidá universitaria, tanto disponiendo de servicios de traducción como de promoción llingüística y cultural. Vamos dar un papel relevante a la llingua asturiana como ficimos estos cuatro años, ufiertando cursos de capacitación llingüística a la comunidá universitaria (estudiantáu, PAS y PDI), afondando na collaboración cola Academia de la Llingua Asturiana y los grupos d’investigación universitarios en temes d’estudiu, investigación y divulgación y enanchando l’actividá de la Universidá Asturiana de Branu (UABRA) nel contestu de la Estensión Universitaria. Y vamos siguir dignificando y visualizando l’asturianu nel contestu universitariu buscando la normalización del usu que la llexislación autonómica obliga a promover.

Nesti periodu aumentamos de mou bultable les actividaes d’Estensión Universitaria.

Ordenamos los convenios billaterales con universidaes fuera del ámbitu de la UE, asegurando l’actividá en toos y caún d’ellos.

Nesta nueva etapa vamos ampliar la cobertoria de les nueses aiciones tanto de la Universidá pa Neñes y Neños como la Nueche de los Investigadores y la Selmana de la Ciencia, aumentando tanto’l númberu d’actividaes como les llocalidaes nes que se faen, asina como la collaboración colos centros d’enseñanza preuniversitaria.