Uviéu va tener radio universitaria’l cursu que vien
El candidatu al Rectoráu, Santiago García Granda, incluyía esti sábadu ente los sos compromisos electorales la incorporación de la Universidá d’Uviéu a la trentena d’instituciones españoles d’enseñanza superior qu’ufierten a la comunidá una Radio Universitaria.
A partir de la propuesta d’un colectivu d’estudiantes que quieren crear una radio por y pa los estudiantes, onde sían ellos mesmos los que diseñen y dirixan los programes, siempres dende’l respetu y la responsabilidá, Santiago García Granda va poner en marcha col arranque del cursu un proyectu que yá cunta col sofitu de delles asociaciones de la Universidá, el Conseyu d’Estudiantes y alumnos de distintes facultaes. Un proyectu que cuntaría cola dirección de la institución universitaria pero facilitaría l’autoxestión de los estudiantes de los espacios reservaos pa un llabor creativu que munchos vienen demandando dende va tiempu.
Conectar cola sociedá asturiana, y non yá universitaria, nuna rexón qu’históricamente tuvo unu de los más altos porcentaxes d’emisión radiofónica por habitante y de la que salió toa una escuela de radiofonistes que trunfó en toa España, ye otru de los oxetivos del proyectu qu’apenes precisa inversión y que supondría emitir tantu per medios convencionales como per internet, daes les posibilidaes qu’ufierten los nuevos formatos d’emisión y podcasting.
Aprovechar recursos infrautilizaos ye otru de les exes del programa electoral de la Campaña de Santiago García Granda y la Facultá de Formación del Profesoráu cunta con un estudiu de radiu, qu’usen en delles asignatures y que podría ser aprovecháu y potenciáu, en collaboración col Serviciu de Medios Audiovisuales del Milán, que sería otra pieza fundamental nel proyectu.
Na Universidá española atopámonos anguaño con una tipoloxía bien variada d’emisores de radiu ente la trentena d’instituciones en qu’esisten emisiones radiofóniques. Dende les universidaes que pretenden que la so emisora de radiu sía’l llugar nel que los sos alumnos realicen les sos práctiques pa titulaciones como Comunicación Audiovisual o Periodismu, hasta les que les converten fundamentalmente en llugares d’espresión pa los alumnos, pasando por aquelles qu’intenten convertir el so mediu de comunicación nun centru d’investigación y esperimentación.
La Radio Universitaria de la Universidá d’Uviéu sería una integración de toes estes perspectives, incluyendo tamién tantu la potenciación del Minor de Comunicación qu’anguaño s’imparte nel Milán como l’aportación d’esperiencies docentes que sirvan al refuerzu del estudiu de conteníos apurríos pol profesoráu.
Los distintos tipos de xestión n’España van dende emisores que se venceyen a dalgún departamentu o área de la Universidá a otres que dependen directamente de los órganos de gobiernu de les instituciones educatives o que cunten con una doble xestión o inclusive xestión propia d’alumnos o d’asociaciones d’alumnos. La propuesta pa Uviéu pasa por un modelu integrador, onde tola comunidá universitaria puea participar viviegamente.