Nesti periodu, como figuraba nel nuesu programa electoral, desaniciamos la duplicidá de Servicios d’Informática unificando tolos activos nun únicu Serviciu. Coles mesmes, cubriéronse toles vacantes esistentes nel pasáu y les xeneraes durante estos últimos años, resultando una anovación de la plantiya y una medría del personal efectivu del Serviciu d’Informática y Comunicaciones. Nos próximos años queremos meyorar esti serviciu creando una capa entemedia de responsables téunicos que s’encargue de coordinar les aiciones realizaes n’ámbitos concretos. Vamos crear 20 nueves places pa meyorar la cobertoria d’aspeutos clave como puen ser el desarrollu y caltenimientu d’aplicaciones de xestión, la seguridá, el caltenimientu de los sistemes y de les redes corporatives o l’asistencia a les xeres docentes en tolos campus de la universidá y vamos poner en práutica un sistema remuneráu de guardies que dexe atender a sistemes críticos fuera del horariu habitual de trabayu pa garantizar un funcionamientu 24×7.


Infraestructures

Nestos cuatro año ficimos importantes inversiones na infraestructura básica pal funcionamientu de la universidá: modernización de la rede de comunicaciones, contratación de servicios de caltenimientu d’equipamientu ya instalaciones, meyores na eficiencia de les nueses sales de servidores, meyores na protección d’estes infraestructures crítiques, modernización d’elementos de seguridá, modernización de repartidores de carga, alquisición de cabines d’almacenamientu y servidores, renovación del cableaxe de comunicaciones en delles dependencies ya instalación de nuevos puntos d’accesu a la rede, completa renovación del serviciu de telefonía fixa, meyores de les condiciones del serviciu de telefonía móvil, meyores nes condiciones del serviciu de interconexón de campus y renovación del equipamientu necesariu pa esa interconexón, modernización del software base del sistema de control d’accesos y presencia. Dientro d’estes actuaciones ye importante destacar la puesta en práutica de la rede inalámbrica de comunicaciones WI-FI, na que se fexo una inversión bien importante pa buscar una cobertoria total nes nueses instalaciones.

Nesti nuevu periodu, les actuaciones n’infraestructura básica van empobinar hacia la culminación de l’ampliación de cobertoria WI-FI nos edificios que falten, la finalización de la puesta en práutica de los equipos de comunicaciones yá alquiríos pa completar la renovación de la rede corporativa, la meyora del equipamientu de comunicaciones esplegáu na sala de servidores del edificiu Severu Ochoa, l’establecimientu de sistemes d’alta disponibilidá pa los sistemes críticos, la sustitución de dellos elementos de seguridá, la habilitación xeneralizada d’un serviciu de teléfonos software que dexe atender el teléfonu dende l’ordenador de los usuarios y la completa modernización de la electrónica de control d’accesu y de presencia.

En cuantes al equipamientu d’usuariu, y con rellación al equipamientu informáticu de los Servicios Centrales, acometióse un procesu d’inventariu, y realizáronse dos planes de renovación, que dexaron anovar un 45% del parque d’equipos. Nel nuevu periodu, van acometese nuevos planes de renovación, prosiguiendo’l procesu de meyora continua del equipamientu.

Pa dar soporte a los departamentos y a les alministraciones de campus na alquisición d’equipos informáticos, realizáronse programes añales d’alquisición centralizada d’equipos. Por aciu estos programes, les distintes entidaes universitaries alquirieron unos 500 equipos. Va siguise cola realización añal d’estos programes, con oxetu de facilitar el procesu de renovación del equipamientu informáticu nos Departamentos y nes alministraciones de campus.

La páxina web institucional y la intranet son dos elementos esenciales na vida diaria universitaria. Estos elementos clave precisen ser modernizaos teunolóxicamente y planificaos so un modelu de soporte de nivel empresarial. Nesti últimu añu ficimos la consultoría de base pa definir el procesu de renovación. Nel próximu periodu, proponemos llevar alantre un proyeutu de completa actualización del portal institucional y de creación d’una nueva Intranet qu’apurra una esperiencia d’usuariu dafechu personalizada y qu’integre, de mou tresparente, los distintos servicios que dende ella s’ufierten.


Campus virtual ya informática pa la docencia

Nel ámbitu docente, el Campus Virtual ye un sistema críticu pal funcionamientu cotidianu de la universidá. Durante esti últimu periodu realizamos delles actuaciones, ente les que destaca la integración con un nuevu sistema antiplaxu. Sicasí, esti sistema tamién precisa ser modernizáu teunolóxicamente incorporando les últimes novedaes. La nuesa propuesta ye empezar el cursu 2021/2022 con una versión dafechu anovada del Campus Virtual qu’ufra una esperiencia integrada con otros sistemes utilizaos na docencia como puen ser Microsoft Teams y otres aplicaciones que formen parte del ecosistema del Office 365. Vamos esplegar el nuevu Campus Virtual pa desaniciar les llimitaciones de recursos y meyorar la esperiencia del usuariu cuando se conecten dende so casa.

Con rellación a les aules d’ordenadores dedicaes a la docencia, féxose un gran esfuerzu na renovación d’ordenadores, algamando a un 55% del parque d’equipos. Tamién meyoramos la xestión de la rede d’aules, (rede qu’integra los equipos de toles aules de los centros universitarios), optimizando l’arquitectura de servicios d’esta rede, y modernizando los servidores que dan soporte a estos servicios. Del mesmu mou, creáronse nueves aules d’ordenadores en dixebraos campus universitarios. Nel nuevu periodu, vamos siguir col plan añal de renovación d’ordenadores, de mou que la vida media de los equipos se caltenga siempres dientro d’unos parámetros afayadizos. Amás, van atendese les solicitúes de los centros al respective de la creación y dotación de nueves aules d’ordenadores. Per otra parte, vamos integrar nes aules les teunoloxíes dixitales pa la impartición de la docencia (pizarres dixitales, tabletes, sistemes de retresmisión, etc.) ellí onde se necesite o puedan apurrir valor añedíu na esperiencia docente.

No que cinca al software educativu, alquirióse una llicencia Campus del software de computación numbérica MATLAB, na que’l so usu ye tresversal na docencia d’un significativu númberu de centros y departamentos universitarios. Aprovechando la esperiencia de MATLAB, van tratar d’identificase otres necesidaes tresversales, que puedan tratase tamién por aciu de soluciones del tipu de llicencies Campus. Asinamesmo, va dáse-y un sofitu, pasu ente pasu, a los departamentos na alquisición de software de simulación, p’atender a necesidaes docentes específiques.


Aplicaciones de xestión y alministración electrónica

A lo llargo d’esti periodu desarrollamos nueves funcionalidades y anováronse teunolóxicamente la gran mayoría de les aplicaciones de xestión, ente les que s’atopen les de los servicios académicos pa estudiantes y pal profesoráu, servicios de coordinación d’estudios de posgráu, portal de trámites de doctoráu, pruebes d’accesu a la universidá, preinscripción y matrícula online, xestión de movilidá saliente, xestión de movilidá entrante, inscripción en pruebes de nivel de llingua estranxera, portal del emplegáu, convocatories de contratos de personal con cargu a fondos d’investigación, xestión de práutiques clíniques y otres práutiques esternes, sistema d’información xeográfica, portal de servicios a empreses, portal pa demandantes d’empléu, consulta de censos en procesos electorales, sistema de sofitu al programa DOCENTIA, sistema de mensaxería, serviciu de directoriu y aplicación de páxines blanques, sistema de control d’accesu y presencia, y rexistru telemáticu. Amás, realizáronse numberosos desarrollos nel programa SIES utilizáu poles alministraciones que dexaron meyorar la xestión n’ámbitos concretos como pue ser la xestión de doctoráu, la xestión de trabayu fin d’estudios, la xestión de grupos de docencia, servicios para ONEO y la Unidá d’Igualdá, la xestión de la planificación docente, xestión de les programaciones conxuntes d’estudios oficiales de Grau (PCEO), espedición del Suplementu Européu al Títulu (SET), integración del sistema GESINTER, etc.

En cuantes a la puesta en práutica de nuevos sistemes, finamos el del sistema de xestión económica y de la investigación entamáu pol equipu de gobiernu anterior. Implantóse un nuevu sistema de xestión pal Serviciu de Prevención de Riesgos Llaborales, féxose un nuevu Perfil del Contratante. Afayáronse mecanismos de llicitación electrónica. Punxóse en serviviu un nuevu sistema de xestión electrónica d’espedientes de contratación, un nuevu sistema de consulta del Archivu de la Universidá d’Uviéu, un nuevu sistema pa xestión de convocatories de contratos de PDI llaboral ya interín y una solución de portafirmes pa la firma electrónica integrada en procesos de tramitación. Modernizáronse los sistemes principales de biblioteca por aciu la sustitución de OPAC y de AMICUS. Estrenóse un nuevu multibuscador pa la Biblioteca. Fiximos un gran esfuerzu nel desarrollu de tola tramitación d’ayudes. Desarrollóse un nuevu sistema de restauración de claves. Planificáronse nuevos servicios de consulta de datos d’otres alministraciones pa los servicios alministrativos por aciu de veceru llixeru, púnxose en marcha un nuevu serviciu de cita previa. Cuntamos con una nueva aplicación móvil corporativa, un nuevu portal de software corporativu y ficiéronse numberosos portales ente los qu’hai que destacar el desarrollu completu d’un nuevu Portal de Tresparencia.

Del mesmu mou, completóse’l desarrollu d’un nuevu sistema integral pa la xestión d’estudios non oficiales (FNOF), qu’anguaño ta siendo utilizáu principalmente pa xestionar estudios d’Estensión Universitaria. Tamién punximos en marcha numberosos trámites electrónicos enfocaos a los distintos colectivos. Ente ellos, la emisión de fueyes de serviciu en formatu autoserviciu, la solicitú de permisos y llicencies y la solicitú d’instancia xenérica por rexistru electrónicu, con un ampliu algame pa tolos coleutivos. Asinamesmo, estableciéronse les oficines del rexistru (xeneral y auxiliares) como oficines de rexistru pa l’acreitación d’identidá na emisión de certificaos electrónicos de la FNMT y simplificóse’l procedimientu de solicitú pa tolos coleutivos de la Universidá d’Uviéu. Siguiendo la estratexa de reutilización de recursos ufiertaos pola Alministración Xeneral del Estáu, entamóse l’espediente electrónicu de contratación integráu dafechu cola Plataforma de Contratación del Sector Públicu, según la integración col Rexistru Central de Personal al traviés de Anot@.

El gran retu de los vinientes cuatro años va ser finar el procesu pa la total tramitación electrónica de los procedimientos. Vamos integrar el sistema de rexistru col Sistema d’Intercambéu de Rexistru d’otres alministraciones públiques y l’implantación del archivu y espediente electrónicu pa tola Universidá d’Uviéu. Vamos siguir cola definición y puesta en marcha de nuevos procedimientos electrónicos, enfocaos principalmente a simplificar y entainar la tramitación alministrativa, como son los gastos de llocomoción, les comisiones de serviciu pal coleutivu de PAS y PDI, o la tramitación electrónica d’espedientes de gastu tanto d’investigación como del restu de servicios universitarios.

Nel ámbitu del estudiantáu, d’especial relevancia ye la espedición de certificaos académicos na modalidá d’autoserviciu o la emisión de la copia auténtica electrónica del títulu. Igualmente, ye de fonda importancia la interconexón ya integración de los trámites electrónicos de xestión académica col Nodo de Interoperabilidad del Sistema Universitariu Español (NISUE) y con la “Mobility Tool” del consorciu Erasmus, pal intercambéu d’información académica ente Universidaes y otres alministraciones, según el Serviciu de Verificación y Consulta de Datos (SVC), pa la consulta de datos que yá tán en poder de l’Alministración. Esto va dexar amenorgar la carga burocrática soportada pol estudiantáu nos sos trámites académicos y simplificar los procedimientos.

Otres iniciatives a desarrollar van ser la completa implantación de FNOF nel restu d’estudios non oficiales, la migración d’espedientes académicos de GAUSS a SIES o la modernización del Repositoriu institucional de la Universidá d’Uviéu. Del mesmu mou, ye perimportante la dixitalización de los siguientes procesos: el desarrollu de nueves ferramientes pa la coordinación de práutiques n’empresa, la implantación d’una solución de xestión d’espacios, la meyora nos procesos de contratación de personal d’investigación y de PDI funcionariu, la modernización del sistema de revistes electróniques de la universidá, la puesta en práutica d’una solución pa la xestión de congresos, la modernización del sistema d’agospiamientos universitarios, la meyora del sistema d’encuestes corporativu y la meyora del sistema de censos pa dar cobertoria a procesos electorales distintos de los de Rector y Claustru Universitariu.


Atención al usuariu

En rellación col Centru d’Atención a Usuarios del Serviciu d’Informática y Comunicaciones, nesti caberu periodu meyoráronse les condiciones de serviciu. Dispónse d’una atención n’horariu estendíu con un primer nivel en réxime 24/7 que da serviciu a los estudiantes y non solo al personal, sinón qu’inclúi la xestión de garantíes de los dispositivos corporativos y la sustitución de componentes averiaos, y apurre equipu de cortesía durante la igua d’averíes, soporte a aules de centros, etc. Nel próximu periodu vamos meyorar el serviciu por aciu del inventariáu d’equipos y la realización de xeres de caltenimientu de forma proactiva, la implantación d’un serviciu de chatbot pa l’asistencia a usuarios, el desarrollu d’un portal de autoayuda con información rellacionada colos problemes más frecuentes y la dotación de personal propio pa la habilitación d’un serviciu de soporte especializáu n’aspeutos de seguridá y pa l’asistencia a xeres docentes en tolos campus de la universidá.

Queremos llevar alantre un proyeutu de completa actualización del portal institucional y de creación d’una nueva Intranet

Con rellación a les aules d’ordenadores dedicaes a la docencia, fexóse un gran esfuerzu na renovación de los equipos, algamando al rodiu del 55% del parque d’equipos.