Ordenación de campus

L’agrupamientu de les nueses instalaciones para meyorar los servicios y optimizar recursos ye un oxetivu antiguu na nuesa institución. Nos próximos cuatro años, vamos buscar la reordenación de los campus de la ciudá d’Uviéu en base al plan que diseñamos y que recueye la reunificación de los estudios de la universidá na ciudá d’Uviéu al rodiu de dos grandes campus: El Milán y El Cristu.

Vamos completar les infraestructures actuales para meyorar los nuesos campus, como la construcción d’una residencia universitaria y más instalaciones deportives nel Campus de Xixón/Xixón, la recuperación pa nuevos usos de la entrada del Pozu Barreo o l’adecuación de la escampada del Edificiu del Severu Ochoa, ente otres actuaciones.

Patrimoniu

L’Edificiu Históricu de la Universidá d’Uviéu ye la imaxe de la nuesa institución académica. Nesti periodu ficimos actuaciones na so redolada, dando-y valir, dinamizando’l so usu y fomentando la so apertura. Fexéronse pequeñes obres de meyora y puesta a puntu, como l’amoblamientu de la Sala de Togues, la recuperación de los tablones d’anuncios, la meyora de la estética del ascensor, la restauración del bustu d’Isabel II nel patiu de la Reina o la de la estatua del Fundador nel centru del Patiu del Edificiu Históricu. Amás, abrimos la nueva llibrería universitaria nel Edificiu Quirós.

Nesti nuevu periodu, como proyeutos inmediatos, vamos entamar l’arreglu de la Capiya de San Sebastián y la recuperación de l’Aula José Gaos. Vamos completar el trabayu de la Comisión de Memoria Histórica, cumpliendo tolos compromisos que l’aplicación de les lleis de Memoria Histórica demanda de la universidá. Amás, vamos poner en marcha un plan de caltenimientu del patrimoniu históricu, moblame y obres d’arte, pintura y escultura.

Edificaciones

Los arreglos nos nuesos edificios fueron una constante nestos cuatro años. Realizáronse importantes aiciones, sobremanera no que se refier a cubiertes ya instalaciones eléctriques. Anguaño, ta llevándose a cabu una importante actuación nel edificiu anexu al hestóricu enantes ocupáu poles organizaciones sindicales. Esta actuación va dignificar unos espacios qu’escarecíen d’unes condiciones mínimes d’usu, buscando’l cumplimientu d’un altu estándar tocantes a aisllamientu y eficiencia enerxética, teniendo en cuenta que la so conexón col edificiu ocupáu polos vicerrectoraos va dotar a esti d’unes condiciones d’accesibilidá de les qu’agora escarez.

Nesti nuevu periodu vamos siguir reparando cubiertes, instalaciones eléctriques y saneamientos. Entamaremos el saneamientu de la Facultá de Química, la renovación del Edificiu de Medicina del Deporte, la instalación eléctrica d’Económiques y Llamaquique o la recuperación de la “casa del conserxe” del edificiu de Marina Civil. Vamos Siguir coles actuaciones n’accesibilidá pa rematar el plan emprimáu nesti mandatu.

Eficiencia enerxética y ambiental

Nestos años dimos pasos en firme p’amenorgar la buelga de carbonu de la Universidá d’Uviéu por aciu la meyora de la eficiencia de les nueses instalaciones. Sustituyimos lluminaries por LED. Meyoramos los sistemes de calefacción col usu de calderes más eficientes y enerxíes anovables, como ye’l casu de la estensión del sistema de xeotermia con agua de mina al edificiu Científico-Teunolóxicu del Campus de Mieres. Instalamos válvules termostátiques nos radiadores. Sustituyimos l’aisllamientu d’edificios por aciu la sustitución d’envolventes, siendo les actuaciones más relevantes la sustitución de la cubierta de Marina Civil y del edificiu departamental d’El Milán. Tamién se dieron otros pasos hacia la sostenibilidá, como ye’l plantíu de más de 1.500 árboles, el consumu d’enerxía eléctrica con certificáu de procedencia de fontes anovables, la campaña pa evitar l’usu d’agua embotellao y el fomentu del reciclaxe nos campus, ente otros.

Amás de siguir coles aiciones yá en marcha, nesta nueva etapa vamos completar el plan con importantes actuaciones como l’impulsu definitivu al aprovechamientu de la capacidá de captación d’enerxía solar en fachaes y cubiertes, que va entamar con un proyeutu pilotu nel Edificiu Severu Ochoa y va estendese darréu a les fachaes d’Economía y Empresa, Universidá Llaboral, Edificiu Santiago Gascón, cubierta de la Facultá de Bioloxía, etc.

Tresporte

El tresporte sostenible ye y va ser una de les nueses grandes apuestes. Vamos buscar la xeneralización del Plan Pilotu de Movilidá con Vehículos Eléctricos. Vamos siguir afalando l’usu de la bicicleta. Amás, vamos buscar aliances pa siguir instalando nuevos puntos de carga de vehículos eléctricos nos distintos campus.

Esti equipu foi consciente dende la so llegada de que’l Campus de Mieres presentaba un importante problema pa qu’estudiantes d’otres llocalidaes pudieren allegase a él con comodidá. Poro, xuntamente cola alministración llocal y autonómica, punximos en marcha la cofinanciación del tresporte públicu al campus. Nesti nuevu mandatu vamos siguir apostando por esta aición, amás de fomentar l’usu de vehiculos eléctricos a disposición de tola comunidá universitaria.

Vamos construyir una residencia universitaria y más instalaciones deportives nel Campus de Xixón/Xixón, vamos recuperar pa nuevos usos la entrada del Pozu Barreo y vamos afayar la escampada del Edificiu del Severu Ochoa, ente otres actuaciones.